ئاوه ز
 

هه‌ر زوانێو، هه‌سارێوی پڕشنگدارا

کوورش ئه‌مینی­نودشه

«چه‌م وسته‌یوی خێرا سه‌روو ویه‌رینوو ڕۆ جه‌هانی زوانی ئه‌دایی»

هه‌میه‌توو زوانی ئه‌دایی

(دلێ که‌مانه‌ینه و وه‌ڵێ گرد چێویه‌نه، به‌ نۆبه‌و وێم رۆ 2 مانگۆ سیاوکامی، رۆ جه‌هانی زوانی ئه‌دایی ته‌بریک ماچوونه. ئاواته‌وازه‌نا ساڵێوته‌ر ئی وه‌خته‌ که‌س نه‌بۆ سه‌رزه‌مینه‌نه‌ که‌ زوانی ئه‌داییش چنه‌ش سزا کریۆ).

زه‌مانێوه‌نه که ژیوئه‌ژناسێ به ویاره‌ی وه‌ختێوی فره و خه‌رجێوی فره‌ته‌ر ساڵه‌های ساڵ ئینای هه‌وڵ و ته‌قالانه تا پرزوو فڵانه حه‌یوان یام گیواوی جه فه‌وتیای ڕزگار که‌را، ئایا ئێژا نیا که ئا حه‌ساسیه‌ته په‌ی زوانه‌کاچ بۆ که هه‌رکامشا میراسێوی به تین و هێزا په‌ی کۆمه‌ڵگاو به‌شه‌ری که وێش به درێژایی هه‌زاران ساڵا وه‌ش بیه‌ن. به جۆرێو که متاومێ واچمێ زوان فه‌رهه‌نگ سازا. زوانی ئه‌دایی یه‌که‌م زوانێوا که هه‌ر ئێنسانێو فێرش بۆ. هایدگێر فیلسووفی ئاڵمانی قسێوه‌ش هه‌نه که ماچۆ: «زوانی ئه‌دایی قه‌لب و ڕۆحوو ئێنسانیا. که‌سانێو که چنی ئی زوانیه گژیا؛ واقێعه‌نه چنی قووڵته‌رین لایه‌نوو هۆڤیه‌توو ئا ئێنسانیه گژیا و په‌وکه‌تی سه‌رمه‌گنا». زوان میراسوو مه‌عنه‌وی به‌شه‌ریا. ئێنسانه‌کێ به زوان و ڕاو زوانیه‌نه میاوانه هه‌نترینی و گه‌شه که‌را. کاریگه‌ری و شۆنه‌ماو زوانی دلێ کۆمه‌ڵگاینه تا ئاستێوا که بێ زوانی ڕه‌وتوو ئیسه‌و کۆمه‌ڵگای نه‌کریا و چه‌رخه‌و ژیوایش مدرنۆ. وه‌ختارێو جه هۆرگێرته‌ی، پارێزنای، گه‌شه و ژووژنای فه‌رهه‌نگ و ئه‌ده‌بیاتوو نه‌ته‌وێوی قسێ که‌رمێ ئانه به که‌ره‌سه‌و زوانیا، ئی زه‌نجیره لکیۆ پێوه‌ره و ویه‌رده، ئیسه و دماڕۆ ئا وه‌ڵاتیه میاونۆنه خه‌رمانوو سه‌عاده‌ت و وه‌شی. هه‌میه‌توو ئی حه‌ڵقێ تا یاگێوه‌ن که ئه‌گه‌ر که‌سێو حه‌قوو قسه که‌رده‌ی و فێرکاری به زوانوو ئه‌دایش چنه‌ش گیریۆ؛ پێوه‌نیش چنی کۆمه‌ڵگاو ده‌ورووبه‌ریش گنۆنه له‌رزه و ڕه‌وتی ته‌بێعیشه‌نه به‌ر مه‌ی. به‌ینه‌نه لوای و فه‌وتیای هه‌ر زوانێوی یه‌که‌م پله‌و ئه‌وه‌تاوناو ئا نه‌ته‌وه و ئا خه‌ڵکیه‌نه. هةر چن سیستێموو فێرکاری فره‌و کێشوه‌ره‌کانه فره‌و وه‌ختا زوانێو بیه‌ن به زوانی فورمی و قانوونی، به‌ڵام بڕێوشانه پاڵوو زوانی ڕه‌سمیه‌نه که‌ره‌سه و ده‌رفه‌تێو دریان به زوانه بوومیه‌کاچ تا ژووژیاوه و گه‌شه که‌را. به داخه‌وه بڕێویچشانه گردوو بوودجه‌و ئا وه‌ڵاتیه په‌ی گه‌شه‌و زوانی قانوونی خه‌رج کریۆ.

هه‌میه‌توو ڕۆ جه‌هانی زوانی ئه‌دایی

زوان تینوو باوه‌ری و هه‌ناسه‌و ژیوایا. به په‌یلواو ئێمه پێسه که‌سانێوی هه‌ورامی زوان، ڕۆ جه‌هانی زوانی ئه‌دایی ئامیان و ده‌رفه‌تێوا په‌ی به‌روسه‌ی و نیشاندای هه‌میه‌ت و حه‌قێقه‌توو ئی زوانیه جه تۆگێرته‌ی هۆوییه‌ت (کێبیه‌ی)ی هه‌ورامیانه‌مانه. هه‌ورامان و کارکێردوو ئی هۆوییه‌تیه جه دنیاو په‌ڕ تاف و شه‌پۆلوو ئارۆیه‌نه جۆرێوا که به تایبه‌ت په‌ی هه‌ورامی زوانا گردوو ژیوای و ڕانیشانده‌روو دماڕۆیا. ئی زوانه‌نه؛ ئێمه پێسه تاکێوی دلێ کۆمه‌ڵگاینه دیارێ و تایبه‌تمه‌ندیه‌کاما ئه‌ژناسه که‌رۆ. ویه‌روو ئی زوانیه‌نه میاومێنه وێما و ئێحتێرام منیه‌یمێره په‌ی یۆترینی. ئینه سیاسه‌ت و به‌رنامێوا که یونێسکۆچ پاڵپشتیش چنه که‌رۆ و هه‌زاره‌و یه‌رۆمیه‌نه گه‌شه، فێرکاری و وه‌ڵاوه‌که‌رده‌ی زوانی ئه‌دایی به شانازی مزانۆ. چوونکه‌تی ئادێ ئینای پا باوه‌ره‌وه که فێرکاری به زوانی ئه‌دایی ده‌رفه‌تێ به‌رابه‌رێ وه‌ش که‌رۆ په‌ی خه‌ڵکی و بێسه‌وادی تا ئاستێوی فره مارۆره وار. حه‌ر پاسنه ئێمه باوه‌رما هه‌ن؛ پارێزناو زوانی ئه‌دایی زامنوو هۆرگێرته‌ی و یاونای زانشتی بوومی په‌ی پرزی دماینیا. مه‌سه‌لێوه ئافریقایه هه‌نه که ماچۆ: وه‌ختارێو پیرێوی زانا مرۆ؛ کتێبخانێوی ته‌مام دلێنه مشۆ. مشیۆم زوانوو ئی کتێبخانا هۆرگێریۆ و بیاوۆ ده‌سوو ئا زاڕۆڵا دماته‌ر مه‌یا. ئێمه حه‌قمانه زوانوو وێما بنویسمێ و به‌رمێشه‌نه دلێ کتێبی تا چی ڕانه زوانما گه‌شه که‌رۆ. ژیواو زوانه‌کا پێوه‌نیش هه‌ن چنی قسه که‌رده‌ی و فره‌ته‌ی چانه‌یه ژووژنای و گه‌شه‌دای ئه‌وه‌جه‌ش به کۆما و چاپ و نویسه‌ی کتێبی هه‌ن. مشیۆم کتێبێ به زوانی ئه‌دایی بنویسمێ تا زاڕۆڵێما بتاوا به زوانوو ئه‌دایشا فێرێ با و بواناوه. ئی ڕۆ مارۆوه ویرما که مشیۆم سیستێموو فێرکاری چن زوانه بۆ و حۆرمه‌ت و ئێحتێرام بنیۆره په‌ی گه‌شه‌و گردوو زوانه‌کا و ده‌رفه‌تێو بارۆ وه‌ره‌وه په‌ی که‌ڵک جه زوانه‌کا دلێ سیستێموو فێرکاریه‌نه. فێرکاره‌کێ (ماموستا) مشیۆم چی ڕۆنه جه مسیاره‌کاشا گه‌ره‌کشا بۆ به زوانی ئه‌دایی وێشا قسێ که‌را و جوابوو ده‌رسی داوه. شێعرێ، گۆرانیێ، ڕازێ به زوانوو وێشا واچا و سه‌روو که‌لاسیه‌وه گێڵناوه. فێرکاره‌کێ مشیۆم مسیاره‌کاشا فێرکه‌را که زوانێ جیاوازێ یانێو فه‌رهه‌نگی جیاواز و وه‌رچه‌می جیاواز په‌ی دیه‌ی جه‌هانی. ئێداره‌و ئێرشادی مشیۆم چی ڕۆنه به‌رنامێ زوانیێ فرێش با؛ پێسه، جه‌ژنۆڕۆ جه‌هانی زوانی ئه‌دایی، هه‌مایێش جه‌باره‌و زوانی ئه‌دایی و به زوانی ئه‌دایی، نمایێش به زوانی ئه‌دایی، گۆرانیێ و ...


ادامه مطلب

نوشته شده در تاريخ دوشنبه بیست و هشتم بهمن ۱۳۹۲ توسط كوورش ئه‌ميني
 

"بێ قەزا بی کاک کوورش ئانە هەڵەن وەشش کەرە (ڕونامه ) پێسە مامۆ خەپەی دستەنە بەرشیەن"

 ئینه ئازیزیوی به نامو کاکه ...... نویسةن. گةرةکما واچوو ئةگةر خاس ورد بیةوه سةروو مةتنةکةی مزانی که دروسا.



نوشته شده در تاريخ دوشنبه هفتم بهمن ۱۳۹۲ توسط كوورش ئه‌ميني

قەشێو (کشیش) ئوتوبووسەنه نیشتەبیره. دلی ڕاینه، مەسیوی سەروەش و سەرشیت سوار بی و  لاشەنه نیشتەره. پیاکه ڕونامیوش کەردەوه و دەسش کەرد ئەوەوانای. شونو ماوەیویەره پەرساش قەشەکەی و ماچو: "ماموسا واداری (ڕوماتیسم) جه چیشیەوه مەی". قەشەکەیچ ئەجیاش گالتەش کەرو، ئینه بی که دەسش کەرد موچیاری کەردەی: "واداری، هینوو مەسی، شەراب واردەی و کاره خرابان".

 پیاکه سەرەش وسەره و حیچش نەوات و دەسش کەردەوه ڕونامه وانتەی. شونو ئانەیەره قەشەکه جه ئادی پەرساش: " مەگەر تو چن وەختێن واداریت گێرتەن؟". مەسەکه جوابش داوه؛ من واداریم نیا.

چیگەنه نویسیان: " پاپی گەوره، تووشوو واداریێوی خرابی ئامان" 



نوشته شده در تاريخ پنجشنبه سوم بهمن ۱۳۹۲ توسط كوورش ئه‌ميني

جامێعەو ئارۆی و دنیای مۆدێڕنی ئارۆیی، سەروو تاکیوە جەختش کەردەن وباسووحورمەتێو کە دنیاو ئارۆی پەی تاکەکا منیۆشەرە، جە ویەردەنە جە هیچ مەحاڵێوەنە نەپیویان.حەرپاس کە مزانمێ، ژیوای خەڵکی جاران ژیوای گردی بیەن و فرەش دلێ دەگایەکانە پاڵووهەنترینی و سەروو تەبێعەتیوە کارشا کەردەن و حەرپاسە بنەماڵەکێ فرێشا داراو زاڕۆ و ئاژەڵی فرەی بێنێ. دماو ئانەی کە شارنشینی دەس پەنە کەرۆ و بە ئامای دنیاو تێکنۆلۆژی، ژیوای خەڵکی تووشوو فاڕوجمەی مەی و چی دنیانە ئیتر تەنیا ئەسڵو و نەسەب یاگێش نمەمانۆ، بەڵکو تاومی واچمێ بە گردیچ جە بەین ملۆ و ئیتر تاکەکێنێ جە جامێعەینە یاگۆ وێشا کەراوە و ڕاو وێشا هۆرچنا و وێشا مدا دیاری و ملا شۆنۆ داواچەکاشارە و دنیاو دەورووبەریشا تووشوو فاڕوجمەی کەرا.  هەر وەڵاتێوە هەر مێیللەتێوە و هەر قەومێوە کە بتاوۆ دلێ دنیاو ئارۆینە یاگێش بۆ و تاریخ بە با شی نامێش بنیۆسەر، نیازش بە ئینسان های بلیمەت و ڕچەماڕێ هەن، کە دلێ قووڵایی ژیوای میللەتەکەیشانە ووڵاتەکایشانە بیێنێ و دەردو خەڵکیشا بە دەردەو وێشا زانانشا و سەردی و گەرمی ڕۆزگاریشا چەشتەن ئا وڵاتە کە هەنێ دلێشەنە و ئا ئەندیشە کە هەن مەژگشانە یاوناش بە یاوگەیوی بەرز.   ئارۆ ساڵ گێڵوو کەسێوەن کە ساحێبو ئەندیشەو خرەدی وئینسان دۆسی بیەن، هەرچن ئی قەڵەمێ نمەزانۆ و نمەیارۆ باس جە ئەندیشە و ئاوەزوو ئا ئینسانە گەورەیە کەرۆ، بەڵام تەنیا دەردە دڵێوەن کە چفنۆش گۆشوو کاغەزیرە.  ئینسانی هورامی پەی ماوەو چن دەها بڕیابێ جە وڵاتەکەیشۆو لاش کەردێفی لاو بێگانەیو و دوورکەوتەیوی جە دنیا و وەتەن دۆسی، عەقڵو وێش نیابێ مشتەو سیاسەتێوە و وێش کەردەبێ بە قوربانی سیاسەتی و جە وێ بێگانە بیەیوە. مستەفازادە پێسە پەیام ئاوەروو گەورەو هەورامانی، لێرەسەختانە ئامانە مێذان و دەسش کەرد بە وانایۆ و نویستەو ڕۆشنگەری کەردەی و باوەڕش پانەی کەردە بێ کە ئینسان تا وێپا نەبۆ و کێبیەەو وێش نەیۆزۆوە و نەشناسۆ نمەتاوۆ جە ژیوایشەنە پا جۆرە کە وێش گەرەکش بۆ سەرگنۆ.   ئینە یەک ساڵ ی جە مەرگو کاک محەمەدی مستەفازادەی ویەردەن و گەورەتەرین میراسێو کە دماو وێش ئاستە بۆش جیا، ئاگاوە کەردەی، ڕٶشنگەری و ڕچەماڕوو ئی خەڵکیە بیەن، مستەفازادە گەورەتەرین پەڕچین و وەربەست پەی ئینسانی هەورامی پەی یاوای بە یاوگەکەیش، بە وێ نەپەرمای ووی بێگانەی ئینسانی هەورامی زانێ. گەورەتەرین داڵغەو دڵیش لاواز بیەی زوانی هۆرامی زانێ وئینە کە زوانی هۆرامی بیەن بە قوربانی سیاسەتی،  ڕەنج کێشی. کێبیەی هەمیشەیی ورکەو دڵیش بێ و ئینەیچ دلێ بە رویرەکاشەنە دیارا. پەی  نمونەی جە کتێبو زوانی هۆرامی و دنیای مۆدێڕن ماچۆ: بنەڕەتوو هەر ئیسانیو جە کێبیەی یا هۆڤییەتیش سەرچەمە گێرۆنە و کێبیەیچ جە زوانی، وختارێوناستت کەسێو بە زوانوو وێش قسێ کەرۆ پێسەنە کێبیەش چەنە بسانیوە. وەختێویچ کێبیەیت ئەساو جە کەسێوی یانێو ڕێخێش بڕیەینێ. ڕێخە بڕیەیچ یانێو وشک و نابوود کەردەی جەهانێوی ئینسانی کە حەقی تایبەتی وێش بیێنش پەی ژیوای.   مستەفازادە  سەروو ئی باوەڕێوە بێ کە تاکوو هۆرامی نەیاو بێ وێ ئاگاهی و ئێحساسو ئانەی نەکەرۆ کە ئادیچ تاکێوەن جە جامیعەی و دلێ جامێعەینە نە ئینسان داراو حەق و حقۆقێوەن و بشو ئینسان هەورامی وێش  بیاوۆ پی چێوی. مستەفازادە یاوگەش نە سیاسەت بێ و نە لوابێ پا خیاڵارە کە کەی بۆ بیاوۆ هەندەران تا چەنی هابرماسی و چامسکی پێوەرە و لاشانە عەکسێ گێرۆ، نە یاوگەش پوڵوپارە بێ و نە عەیشو نووشوو هۆرپڕای ئی سەیران و ئەو سەیران کەردەی بە نامۆ پارێزنای فەرهەنگێوە! کە ئارۆ فرەو جە هۆرامیەکا لاو ئێمە چە بە ڕۆشنویرشۆ چە بە عەوامشۆ هەنێ شۆنەو ئی چن چێویوە. ئاد تەنیا دەردەو جامێعەو هەورامانی وێ ئاگاهی و وێ بیەی زانێ و جە ئاوەزوو مەژگشەنە کەلیمێوە توەش گێرتێ بێ کە تا حەتا حەتا هەن جە سەروو زوانوو خەڵکەکەیشۆ نمەبڕیۆ.     " بنویسمێ بە زوانی هۆرامی، بوانمێوە بە زوانی هۆرامی کە ئاڵاو قەڵەمی نەبڕیەینە باڵاو حیچ میللەتێویەرە.

سەعدۆڵڵا خون خام(شەهریار)



نوشته شده در تاريخ دوشنبه سی ام دی ۱۳۹۲ توسط كوورش ئه‌ميني

یه‌کساڵ دماو کوچوو زینه‌یاد محه‌ممه‌د مسته‌فازاده‌ی په‌یام ئاوه‌روو هۆرامانی جه‌ ویه‌روو زوان و فه‌رهه‌نگینه‌ تاوه‌و وێ ئاگاهی، ئاگاهی زوان ئه‌دایی، باوه‌ڕ به‌ وێپایی زوان و فه‌رهه‌نگی هۆرامی سه‌رانسه‌روو هۆرامانیش گێرته‌نه‌ره‌ و "زوانی هۆرامی و دنیای مودێڕن" پێوه‌ ئاشتیشا که‌رده‌ن. ئودیسه‌و پروسه‌و ئاگاهی بێ ئه‌وه‌گێڵه‌ره‌ن. ئی تاوێ مه‌نه‌نش بونه‌ به‌ لافاوه‌ی رێخه‌ به‌ئاره‌ به‌ڵام هه‌ر ئه‌چی بنه‌رانه‌ فره‌و ده‌سا و که‌ساش وسته‌نه‌نه‌ دلێ ویه‌رده‌و بێشعوری و بێ ئاوه‌زی و له‌مه‌مانێچ وسته‌ن دلێ ئه‌وته‌ر ئێنسانه‌ قه‌ساله‌ینه‌ هۆرامیه‌کاره‌. ئی قه‌ساله‌ینانه‌‌‌ خه‌تی ئیشتیباشا وه‌نه‌بیوه. دوور بو جه‌ فامی ئه‌گه‌ر ئاوه‌زشا بیه‌بو‌ و زانابوشا و بزانانه‌ ‌زه‌رووره‌توو روحوو زه‌ما‌نه‌ی چێش بیه‌ن و چێشه‌ن. ئی که‌سانه‌ و ئی ده‌سانه پووشوو‌ هه‌وڵه‌جنانێ زه‌ڕ و واینێ. هه‌ر یاگیه‌نه‌ مه‌نافێعشا واسته‌بو و بوازو پاگه‌ره‌ شه‌نه‌ و هه‌ر کوگه‌نه‌ زه‌ڕ بیه‌بو ئاگه‌شانه سه‌ره‌نگ و‌ وێچن که‌رده‌ن. جمیاوه‌و ئه‌وه‌ژیوای زوان، ویه‌رده‌، فه‌رهه‌نگ و ژیواروو هۆرامانی به‌ جوریه‌ وه‌ره‌ش گێرتێنه‌ و خه‌ڵک و دڵسوزاو هۆرامانی پاسه‌ ئاماینێ پیرای و پارێزنایی زوان و فه‌رهه‌نگه‌که‌یشاوه‌ که‌ دوس و نه‌یار سه‌ره‌شا سڕ مه‌نه‌ن. چه‌پوانه‌و حه‌زوو ناحه‌زا و دماو یه‌ک قه‌ڕن بێده‌نگی و چیرپا وسته‌و ویه‌رده‌ و فه‌رهه‌نگو هۆرامانی و بێ کێبیه‌که‌رده‌ی ئینسانی هۆرامی زوانی به‌ هیمه‌ت و لێره‌ی تاقه‌ت پرووکنوو دڵسوزاو ئی فه‌رهه‌نگه‌یه ڕاو‌ هۆرامانی وه‌شه‌ بیه‌نه‌ و خاسی و خراوی‌ که‌وته‌ن وه‌روو چه‌ما و سارایی. په‌ی خه‌ڵکه‌‌که‌ی و ئینسانه‌ به‌ئاوه‌زه‌کا روشنوه‌ بیه‌ن ئه‌گه‌ر مدرامان و موبارێزیه‌ جه‌ خزمه‌توو فه‌رهه‌نگ و ژیواروو مێلله‌تیه‌نه‌ نه‌بو و ئا موبارێزه‌ نه‌بونه‌ به‌ نوونگه‌و وه‌ڵکه‌وته‌یی زوان و فه‌رهه‌نگه‌که‌یش و هه‌رپاسه‌ حورمه‌ت و ئابروی ئێنسانی ئێنسانه‌کا نه‌پارێزنونه‌ هیچ ئیژاییه‌ش نیه‌ن و په‌ی هیچکه‌سی هه‌قانییه‌تش ناورده‌ن و نمارونه‌. ویه‌رده‌(تاریخ) به‌ ده‌سینه‌و ناسیوناڵیسمی ناهۆرامی خه‌ریک بێ هۆرامانی پسه‌و زوان، فه‌رهه‌نگ و ژیواریه‌ ئه‌نتیک و میراسوو به‌شه‌ریه‌تی بسپارو به‌ گڵگو و مووزه‌و ویه‌ر‌ده‌ژناسی به‌ڵام ئا پروسه‌ وه‌رش گیریا و که‌ڵه‌که‌کێ وڕاینه‌ره‌. ئا گرده‌ غه‌در و ناهه‌قیه‌ که‌ جه‌ تاریخوو ئارۆینه‌ ئامان ملوو هۆرامانیره‌ بیه‌ن بونیه‌ په‌ی ئاگاهی و وێ ئاگاهی هۆرامی زوانه‌کا. ئارو هه‌مدیسان کێبیه‌ یا هووییه‌توو هۆرامانی توه‌ش گێرتێنه‌وه‌‌. یانی وێ ئاگاهی تاقی و جه‌می جه‌باره‌و ئانه‌یه هۆرامیێ کێنێ، چێشێبێنێ و ئه‌شو چه‌نییێ با بیه‌ن به‌ باسواتوو (دیسکورس، گفتمان) جه‌م و جه‌له‌سا، ورکه‌و یانه‌کا، جوانه‌کا و گردوو جه‌ماوه‌روو هۆرامانی. ئا زه‌مانه‌ ویه‌رد ئێنسانی به‌ئاوه‌زی هۆرامی زوان کڵاوه‌ بنریو سه‌ره‌ش و گنو شونی ناسیوناڵیسمی ناهۆرامی و جه‌ چه‌م، ده‌لاقه ‌و وه‌رهه‌ڵاو ئادیوه‌ ته‌ماشاوه‌ دنیای که‌رو. ئا زه‌ما‌نه‌ گوزه‌ریا چیروو نامێ ئازادیوازی و کوردایه‌تینه‌ زوان و فه‌رهه‌نگی هۆرامی ژینوساید کریونه و بتاوناشوه‌ و نامی پروسه‌که‌ی بنریو زوان و فه‌رهه‌نگی هامبه‌ش و یه‌کگرتووی کوردی و که‌س نه‌زانو و ده‌نگ نه‌که‌رونه‌. ئه‌ڵبه‌ته‌ تا بیه‌ن هه‌رپاسه‌ بیه‌ن و جه‌ گردوو دنیاینه‌ ئینسانه‌ فندامنتاڵه‌کا، وشگه‌ مه‌ژگه‌گا و ناسیوناڵیسمی نه‌رێنی و هێرشکه‌ر به‌ مه‌یڵوو وێشا گه‌ز و پیمانه‌ مه‌که‌را. کوشته‌و ئینسانا به‌لاشاوه‌ چیویه‌ ته‌بێعین و نامێش مه‌نیا ئازادیوازی و موبارێزه‌ وه‌لێکانێ چێویه‌ پسه‌و ئه‌وه‌ژیوای زوان و فه‌رهه‌نگێوی چن هه‌زارساڵه‌ی به‌ ناهه‌ق و ناته‌بێعی مه‌زانا و نامێش مه‌نیا ئاژاولێ و دماکه‌وته‌یی. په‌وکه‌تێ په‌ی دڵسوزاو هۆرامانی و ئا که‌سانه‌ که‌ به‌دڵ و به‌فام هه‌رمانه‌ مه‌که‌ران باشته‌ره‌ن جه‌ هه‌ر جوره‌ ململانی، قسه‌ و باس و باسوات چه‌نی ئێنسانه‌ شۆوینیسته‌کا، هۆرامیه‌ بێ لێره‌، مه‌نافێعواز و حێزبیه‌کا و چا هۆرامیانه‌ که‌  به‌ زه‌ڕ، پله‌ و پایه‌یی سیاسی و ده‌سه‌ڵات په‌شتیشا‌‌ بینیانه‌وه دووری که‌را، وه‌ختشا به‌هه‌ده‌ر نه‌دا و وێشا نه‌وزان دلێ گێجاوه‌و که‌ڵه‌که‌کاشاوه‌.

ئارو جه‌ ویه‌روو(مسیر، زمینه، بوار‌) زوان و فه‌رهه‌نگی هۆرامینه‌‌ دوێ ڕاێ وه‌رچه‌مێ و جیاوازێ هه‌نێ:

رای یووه‌م راو ئا که‌سانه‌ که‌ په‌ی هۆرامی و هۆرامانی به‌ زوانی هۆرامی هه‌رمان و خزمه‌ت مه‌که‌را. ویرپێک و وه‌رپێکشا گه‌شوه‌که‌رده‌ی و وه‌رپه‌نه‌دای به‌ فه‌رهه‌نگ و هونه‌ری هۆرامی و ئه‌وته‌ر فه‌رهه‌نگه ئاروین، مودێڕن و‌ ئینسانیه‌کاو دنیای و به‌رزوه‌که‌ردوو ئێژایی و حورمه‌توو ئینسانین. ئیده‌سه‌ ڕا‌، ویرچه‌مه(مکتب) و قیبڵه‌ی زوانی و فه‌رهه‌نگیشا هۆرامانه‌ن. باوه‌ڕشا ئازادی و چراوه‌ ده‌سیشا ئاو‌ه‌ز و ئێحساسه‌ن. هیزوو پایاشه‌ مدرامان و لیره‌سه‌ختین. شوعاره‌شا وێ بیه‌ی، تاقیه‌تی(فردیت)، وێپایی و ژیوای ئێنسانی په‌ی گردوو ئێنسانا و فه‌رهه‌نگان. ئیده‌سه‌ وه‌رانوه‌ر به ئه‌ده‌بیات و فه‌رهه‌نگو‌ هۆرامانی وێشا به‌ وه‌رپه‌رس مه‌زانا چوونکه‌تێ ئه‌گه‌ر یو نه‌تاو دلێ زوان و فه‌رهه‌نگو وێشه‌نه‌ و به‌ زوانو وێش بیه‌یش بو و هه‌رپاسه‌ نه‌تاوۆ دلێ زوانه‌که‌یشه‌نه‌ ویر و ئه‌ندیشه‌ بخولقنو،‌ به‌ هه‌قێقه‌ت بیه‌ی فه‌رهه‌نگیش نیه‌ن و ئه‌گه‌ریج بیه‌یش بونه‌ ته‌نیا پسه‌و ده‌سینه‌ی و که‌ره‌سه‌ی ده‌رده‌و زوانانێوته‌ر و فه‌رهه‌نگانێته‌ر موه‌رونه‌.

ڕاێ دووه‌مه‌ ڕاو‌ ئا هۆرامیانه‌ که‌ شونکه‌وته‌و ڕاو ناسیوناڵیسمی کوردینێ. ئیده‌سه‌ چیروو سیوه‌ر و چه‌تره‌و ناسیوناڵیسمی کوردیوه‌ مه‌ژیوانێ و کێبیه‌و وێشا "ئه‌ژناسه‌" مه‌که‌رانێ.‌ ده‌واپیچ، ئیژایی و شه‌رعیه‌توو هه‌رماناشا جه‌ مه‌حاڵوو موکریان و سلێمانی و ده‌ورووبه‌ره‌که‌یش مه‌گێرا. ئی که‌سانه‌ په‌ی وه‌رب و وا‌رانوو مه‌حاڵوو موکریان و سلێمانی هۆرامانه‌نه‌ چه‌ترشا‌ هورداینه‌!

ئه‌چی بنه‌ڕاو سه‌ده‌‌و بیسو یه‌کیه‌نه‌ ته‌جروبه‌و ویه‌رده‌ی و به‌سه‌رئاماو کوماو ئێنسانی پاگه‌یه‌ یاوان تا ئیسه‌ هه‌رکه‌س یا ده‌سه‌ڵاتیه‌ شوه‌نه‌ وه‌حده‌تیوه‌ بیه‌بو یانی جه‌ ویه‌روو فه‌رهه‌نگ و سیاسه‌تینه‌‌ یاوگه‌ و پێکش یه‌ک ته‌شکی، یه‌ک ڕاوینی، یه‌ک په‌یلوایی، یه‌ک زوانی، یه‌ک ویری و یه‌ک ده‌نگی دلێ قه‌وم یا مێلله‌تیه‌نه‌ بیه‌بو سه‌مه‌رش فوتنای یوته‌ری و ژینوسایدی فیزیکی و فه‌رهه‌نگی بیه‌ن. بنجه‌و هه‌ستی سه‌روو جیاوازی و هه‌ساره‌ زه‌ڕڕینه‌و گردوو گیاندار و بێگیاناوه‌ مه‌رزیانه‌ره‌. ئازادی یانی ئازادی یوته‌ری و یوته‌رفامی. ئازاد بیه‌ی یانی قه‌بووڵ که‌رده‌ی بیه‌و یوته‌ری پا جوره‌ هه‌ن نه‌ پاجوره‌ که‌ من گه‌ره‌کمه‌ن و مه‌نافێعوو من موازو. دلێنه‌و فاشیسم و شۆوینسمی لابه‌رده‌ی یوته‌رین. گولاگ، هۆلوکاست، فلێستین، کوماکوشی ئه‌رمه‌نیه‌کا، ئه‌نفالوو کورده‌کا و ژینوسایدوو مسڵمانه‌کاو بوسنی چن مشتێ وه‌رچه‌مێنێ جه ‌خه‌رماندنیاو جه‌نایه‌ت و بێئاوه‌زی ئی گروڵیه‌ بێته‌شکێ!

ئارویچ جه‌ مه‌حاڵوو کورده‌سانیه‌نه‌ هه‌ر ده‌سه‌، ریکینه‌ و ده‌ساڵاتیه‌ باسوه‌ یه‌ک ده‌نگی، یه‌ک زوانی و یه‌ک فه‌رهه‌نگی که‌رو بێ ئیلا و ئه‌ولا شۆوینیست و فاشیسته‌ن. هه‌ر که‌سێو‌ باسوو پێوه‌بیه‌ی و وه‌حده‌تی زوانی و فه‌رهه‌نگیش که‌رد مه‌شیو‌ بزانیو مه‌ژگ و خیاڵش بینیان و ویرش‌ جه‌ ژاری په‌ر ئێشته‌ره‌ن. یه‌ک ده‌نگی و یه‌ک ره‌نگی فه‌رهه‌نگی یانی ژینوسایدکه‌رده‌ی و فوتنای گردوو زوان و فه‌رهه‌نگه‌کا و چیرپا وسته‌یشا په‌ی یه‌ک زوان و فه‌رهه‌نگیه‌ که‌ ده‌سه‌ڵاتی سیاسی و مادی ئینا په‌شتیشوه‌.

ئاژیه‌نه‌ مه‌ژیومێ ئێنسان ئه‌شێ فره‌ به‌ وردی سه‌ر‌نجوو قسه‌و و هه‌رماناو ده‌ورووبه‌رکه‌یش به‌ تایبه‌ت هینه‌و شۆوینیسته‌ ناهۆرامیه‌کا و شونکه‌وته‌ هۆرامیه‌کاشا بدو. ئیده‌سانه‌ و ئیکه‌سانه‌ هه‌میشه‌و دایم ماچا کورد و هۆرامی فه‌رقش نیه‌ن و ئێمه‌ گرد یونمێ. وه‌ختێو کاشی مه‌ی عه‌مه‌ڵ و پسه‌و ئه‌مری واقێعی جه زوان و‌ ئه‌ده‌بیاتوو له‌هجه‌و وێشا و ئه‌ربابه‌کاشا به‌ میلیاردها دولار زه‌ڕ پشتیوانی مه‌کریو و دلێ یاونه‌ره‌ (رسانه‌) جوراوجوره‌کاشانه‌ شه‌و و ڕۆ گردجوره‌ مه‌پارێزناش به‌ڵام نویسته‌ی خێتیه نه‌سر یا په‌خشان‌ به‌ زوانی هۆرامی به‌ خه‌ته‌ر مه‌زانا په‌ی کوردایه‌تیه‌که‌یشا و ده‌سه‌لاته‌که‌یشا. په‌وکه‌تێ نامه‌به‌رده‌ی و واوه‌ی که‌رده‌ی واچه‌زای‌ پسه‌و: ئاسایێشوو وه‌ڵاتی، هێڵه‌ی سووره‌، وه‌حده‌تی کوردی، کوردایه‌تی، زوانی هامبه‌ش و یه‌کگرتوو، دیالێکت یا زاراوه‌ی هۆرامی، به‌ره‌ی یوگێرته‌، ئێمه‌ براینمێ، چاره‌نویسه‌یه‌ هامبه‌شما هه‌ن، ئێمه‌ هامساینمێ و ئێمه‌ تێکه‌ڵێنمێ جه‌ لاو‌ هه‌ر که‌سیوه‌ و جه‌ زوانوو هه‌ر که‌سیه‌وه‌ نویسیایبا، واچیایبا یا بواچیا و بنویسیا نمه‌بو چه‌م بینیا په‌سه‌ند بکریا. یو ئه‌شۆ خاس بزانو هانده‌روو واوه‌ی که‌رده‌ی ‌و نویسیای ئی واچانه‌ چێش بیه‌ن، چێشه‌ن، چه‌ که‌سێو و په‌ی چه‌ مه‌رامیه‌ به‌کارشا مارونه‌. که‌سانیه‌ باسوو برایی، هامسایی و یوبیه‌یی مه‌که‌ران که‌ وێشان نووکه‌ چه‌نیه‌ ئیمانشا نیه‌ن پا قسانه‌ چوونکه‌تێ ئه‌گه‌ر فره‌ بلمێ ئه‌وپه‌ڕشوه‌ منی هۆرامی زوان نه‌ته‌نیا چه‌نی واڵه و براڵه‌‌ کورد زوانه‌کاما به‌ڵکووم چه‌نی دوورته‌رین خه‌ڵکانوو دنیای پسه‌و نه‌وعوو به‌شه‌ری گرد ئینسانێنمێ و هیچ جیاوازی یا سه‌رته‌ریه‌ نیه‌ن به‌ینمانه‌. وه‌لێ ئی که‌لیمانه‌ نیشانێ یا ره‌مزێنی. ره‌مزه‌و پاکتاو که‌رده‌ی‌ و قه‌ره‌چوڵ بڕیه‌و ئه‌ده‌بیات و فه‌رهه‌نگو هۆرامانی. پی واچانه‌ گه‌ره‌کشانه‌ هه‌قێقه‌تی قه‌ڵب که‌را و جه‌ سێوه‌روو ئی واتانه‌ درێژه‌ با به‌ سیاسه‌ت و مه‌نافێعوو وێشا. یاوگه‌شا شونه‌ما گم که‌رده‌ین. پی قسانه‌ نزیک به‌ نیمه‌و قه‌ڕنیه‌ن که‌ هۆرامانشا پاکتاو که‌رد. ئێنسانی ئه‌نه‌فکریا و به‌ئاوه‌ز مه‌زانونه‌ ده‌سکه‌وتوو هۆرامانی و هۆرامیه‌کا جه‌ شونکه‌وته‌و ڕاو ناسیوناڵیسمی کوردی هیچ بیه‌ن. هیچ خاسته‌ره‌ن مه‌شیو بواچمێ وێرانکه‌ر بیه‌ن. به‌ نامێ سیاسه‌تی و ئازادیوازیوه‌ هۆرامان وێران کریان پێوره. جه‌ هه‌رچی ویه‌رێنه‌. ته‌بێعه‌ت، جوغرافیا، زوان، فه‌رهه‌نگ و ویه‌رده‌و هۆرامانی به‌ تاراج بریان و جه‌ گردی موهیمته‌ر کێبیه‌ی ئێنسانی خه‌ڵکوو هۆرامانی بێ سه‌رو و شون و پاکتاو کریان. پاسه‌ ئێنسانی هۆرامی ورد، سوک و بێ حه‌یسییه‌ت کریان که‌ فره‌ی جه سه‌وارداره‌ هۆرامیه‌کا نمیارا واچا زوانما هه‌ن و قسێ شۆوینیسته‌کاشا دلێنی و باوه‌ر که‌رده‌ن ئا‌نه‌‌ که‌ ماچانێ هۆرامی زوانیه‌ دماکه‌وته‌ن و ته‌نانه‌ت نمه‌یش چه‌نه‌ مه‌تڵه‌بی ساده‌ش په‌نه‌ بنویسی چه‌ بیاو به نویسته‌ی‌ واتاری زانستی!!!‌ واڵه‌کێم و براکه‌م، چه‌مه‌‌ گیان باوه‌ڕ فه‌رماودێ گرفت نیه‌ن‌ جه‌ زوانه‌که‌یمانه‌ گرفت ئینا لاو نه‌زانی و که‌مزانی وێماوه‌‌. گڕفت هه‌ن لاو سه‌واداری بێ ئاوه‌زی هۆرامانیوه‌. به‌داخه‌وه‌ ئارو هۆرامانه‌نه‌ سه‌رده‌سه‌و ئاکه‌سانه زێد و دژمه‌نوو زوان و فه‌رهه‌نگو هۆرامینێ برێو جه‌ هۆرامی زوانه‌کانێ که‌ یا حێزبی ویر مه‌که‌راوه‌ و یا  شونکه‌وته‌ راو شۆوینیسته‌ کورده‌کانێ. دلێنه‌ و کرداروو ئی دار و ده‌سه‌یه‌ که‌وته‌ن روه‌وه‌ و په‌ی گرد که‌سی شناسیانی و نامێشا که‌وتێنه‌ دلێ ویه‌رده‌و بێشوعوری.

ئه‌رکوو دڵسوزاو هۆرامانی ئانه‌نه‌‌ زوان و فه‌رهه‌نگی هۆرامی نه‌به‌را چێروو سێوه‌ر و په‌رچه‌مه‌و هیج ده‌وڵه‌ت، حێزب، مه‌رام، زوان و فه‌رهه‌نگی ناهۆرامی‌ و نائینسانیره‌. باشته‌ر ئانه‌نه‌ زوان و فه‌رهه‌نگو هۆرامانی که‌را به‌ یاگه‌هه‌رمان و ژیواهه‌رمانوو وێشا و به‌ هیچ جورێو کارشا نه‌بو سه‌روو هیچ سیاسه‌ت و مه‌رامی ناسیوناڵیستانه‌یو چوونکه‌تێ راو هۆرامانی دلێقه‌وو ئازادی و هوقوقوو به‌شه‌ریه‌نه‌ مه‌گزه‌ریو نه‌ جه‌ دلێ هیچ ئیسمیه‌ته‌رینه‌. واقعیه‌تی تاڵ ئانه‌ن‌ هۆرامیه‌ وێ ئه‌ره‌نیاکا و بێ لێره‌کا وێش بینان به ‌شۆوینیزمی کوردیوه‌ ئه‌گینا ئه‌یشا هیچوه‌خت زوان و فه‌رهه‌نگو هورامیشا به‌ به‌شیه‌ جه‌ وێشا نه‌زانان و نمه‌زانان. پسه‌و‌ حه‌ز و ئه‌لاقه‌ی و باوه‌ڕی تاقی هه‌رکه‌س ئازاده‌ن به‌ هه‌ر زوانیه‌ ناهۆرامی مه‌تڵه‌ب بنویسو و په‌ی یاوای به‌ ئاوات و مه‌رامیش ته‌لاش بکه‌رو و ڕا و راوینوو وێش هوربچنو. به‌ڵام به‌ نه‌زه‌ره‌و من تا ئیسه‌ هه‌ر جوره‌ هه‌رمان که‌رده‌ی په‌ی‌ زوان و فه‌رهه‌نگی هۆرامی‌ دلێ یانه‌و ناسیوناڵیسمی کوردینه‌ به‌ هه‌ر ویانێ و چیروو هه‌رنامیه‌نه‌ بیه‌بو سه‌مه‌رش بنبڕکه‌رده‌ی، یانه‌وێرانی، وێران که‌رده‌ی و تاونایوه‌و‌ زوان و فه‌رهه‌نگو هۆرامانی بیه‌ن و مه‌ینه‌ریچه‌نه‌ (آینده‌) هه‌رپاسه‌نه‌ و هه‌رکه‌س چا پروسه‌نه‌ به‌شدار بۆ ئاگاهانه‌ و ناگاهانه‌ بۆنه‌ به‌ ده‌سینه‌ په‌ی جه‌به‌ین به‌رده‌ی ئی زوان و فه‌رهه‌نگه‌یه و هه‌رپاسه‌ بیه‌ن و بونه‌ به‌ یاردیده‌ر و وه‌ر‌په‌نه‌ده‌روو زڵموو زاڵێماو زه‌مانه‌ی. یانه‌و ناسیوناڵیسمی فه‌رهه‌نگی نه‌ جه‌ کورد‌سانانه‌ به‌ڵکووم گردوو دنیاینه‌ سه‌روو یه‌ک زوانیوه‌ وه‌ش کریان و بنه‌ڕه‌ته‌که‌ش به‌ جورێوه‌ن ئێمکانش نیه‌ن بازیو زوان و فه‌رهه‌نگێوته‌ر جیا جه‌ زوانی په‌شتبینیا به‌ ده‌سه‌ڵاتی سیاسیوه‌ سه‌ره‌ به‌ربارو و بژووژیۆوه‌. په‌ی نموونه‌ی کشوه‌روو فه‌رانسه‌ی جه‌ ویه‌روو زوانینه‌ یو جه‌ پیسته‌رین و ناحه‌زته‌رین ته‌جروباو به‌شه‌ریش هه‌ن. فه‌رانسه‌ی که‌ ئیسه‌ یو جه‌ وه‌ڵکه‌وته‌ته‌رین وه‌ڵاتا و زواناو دنیاین جه‌ ده‌وره‌وو وێشه‌نه‌ په‌ی ئانه‌یه‌ ئا له‌هجه‌ که‌ ئیسه‌و په‌نه‌ش قسێ مه‌که‌ران و منویسان سه‌ر بگنو ده‌ها زوان و له‌هجێ ئا وه‌ڵاتیشانه‌ بن بڕکه‌ردێنێ و هه‌زاران هه‌زار ئینسانێشا کوشتێنێ پێوره‌.  

سه‌رمایه‌ و هێزوو‌ ڕاو و ویرچه‌مه‌و هۆرامانی ئا ئێنسانه‌ سه‌وادارانه‌‌‌ نیه‌نێ که‌ زوان و فه‌رهه‌نگی هۆرامیش به‌ تاراج به‌رد و که‌ردشا به‌ قوربانی سیاسه‌تی ناسیوناڵیستانه‌ی ناهۆرامی و مه‌نافێعو تاقه‌که‌سی وێشا. ئا هورامیانه‌ نیه‌نی که‌ هه‌نێ جه‌هانی به‌زاهێر موته‌مه‌دێنه‌نه‌ و جه سه‌رنیشت و وه‌رنیشتوو دنیاینه‌ زوانی کوردی مه‌حاڵوو موکریان و سلێمانی به‌ زوانو ئه‌داییشا مزانا و شانازی که‌را به‌ کوردبیه‌یشاوه‌ و ئه‌نه‌ وێبه‌که‌زان‌ و پاسه‌ ئاسیمیله و تاویاینێوه‌‌ که‌ نمه‌زانانێ‌ زوانی ئه‌دایی و کێبیه‌ییشا هۆرامین و هێشتا هه‌نێ دنیاو وه‌هم و خیاڵینه‌ و نمه‌ئاوه‌زیانه‌ قسه رومانتیک که‌رده‌ی سیاسی باوش نه‌مه‌نه‌ن. هێزوو ئی ڕای ئا هورامیانه‌ نیه‌نێ که‌ حێزبایه‌تی و کوردایه‌تی مه‌سخ، کاس، وڕ و گیچ که‌ردێنێ و بیێنێ به‌ ئێنسانی کافکایی و گرێگوره‌ سامساکه‌ش!

سه‌رمایه‌ و هێزوو‌ ڕاو و ویرچه‌مه‌و هۆرامانی ئا هۆرامیانێ که جه‌ دوورته‌رین ده‌گایه‌کاوه‌ هۆرامانینه وێشا فێروو هۆرامی نویسته‌ی و هۆرامی وه‌نه‌ی که‌رده‌ن و به‌ چه‌مبڕیه‌ی  ئه‌و‌ سه‌رقافڵه‌ هۆرامانی به‌ "نامه‌ نویسته‌ی به‌ زوانی هۆرامی‌" واڵه‌کا و براڵه‌کا، ئه‌داکا و تاته‌کاشا مه‌ڵاوناوه‌. په‌ی دڵداره‌کاشا حه‌کایه‌توو ئێشق و مه‌ینه‌تی مه‌کورناوه.‌ جه‌ چله‌یانه‌کانه، جه‌م و جه‌م‌یانه‌کانه‌ پا زوانیه‌ ژیوای ژیوا و هاناو ده‌روونی جاودان مه‌که‌راوه‌. میراسوو ئی ویرچه‌مه‌یه‌ ویه‌رده‌ی‌‌‌ زه‌ڕڕین و ئه‌ده‌بیاتێوی کلاسیکی‌ ده‌وڵه‌مه‌نده‌ن. سه‌رمایه‌و ئی ڕای ئا هۆرامیانێ که‌ وه‌رانوه‌روو ئاژه‌و بێ ره‌حموو دنیاو سه‌رمایه‌داری و گه‌ڵه‌کومه گه‌ڵه‌و شۆووینیسته‌کاو وه‌ڵاتی به‌ یه‌هه‌ر و مدرامان، به‌ ده‌سی هاڵی به‌ڵام به‌ لێره‌ و باوه‌ڕی پوڵایین، زانایانه‌ جه‌ زوان و فه‌رهه‌نگیشا، جه‌ کێبیه‌یی و ویه‌رده‌یشا و‌ ئابرو و حه‌یسییه‌تیشا ورگیری مه‌که‌رانێ. دنیاو‌ ئارو و مه‌ینه‌ری دنیاوه‌ تاقیه‌تی(فه‌ردییه‌ت)، وه‌رپه‌رسی (مه‌سئولییه‌ت) و ئاوه‌زین‌. نه‌ جه‌ هۆرامانه‌نه‌ به‌ڵکووم هیچکوگه‌و دنیاینه‌ هه‌ر که‌سیه‌ که‌ تاقیه‌تیش بو و به‌ ئاوه‌ز هه‌رمانه‌ بکه‌رو و وه‌رانوه‌روو هه‌رمانه‌کاشوه‌ وێش به‌ وه‌رپه‌رس بزانو نمه‌بونه‌ و نمه‌تاونه‌ وێش نه‌بو و وێ بێگانه‌ و به‌نده‌و ئید و ئه‌وی بو. ئێنسانی گه‌شاوه‌زی هۆرامیچ به‌شیه‌ن جه‌ نه‌وعوو ئینسانی و هه‌ن چا ئاژه‌نه و یاوان به‌ تاقیه‌تی. هه‌م ئاوه‌زش هه‌ن و هه‌م وه‌رپه‌رسوو جه‌مگاکه‌یشه‌ن.

وه‌ڵ جه‌ گرد چێویه‌نه‌ مسته‌فازاده وێش به‌ ئێنسان زانی. ئه‌رێ! وێش به‌ ئێنسان زانی. گه‌وره‌ته‌رین تایبه‌تمه‌ندیش شه‌هامه‌ت و لێره‌سه‌ختیش بێ. یه‌هه‌ردار بێ و وره‌به‌رز. پیاو موبارێزه‌ی بێ چوون به‌ هه‌رمانه‌کاش عێلم و ئیمانش بێ‌. به‌ باشی یاوابێنه‌ ئه‌و‌ دیالێکتیکوو زێهنییه‌ت و عه‌ینییه‌تی دلێ هه‌رماناشه‌ن و ژیوایشه‌نه‌. وێش به‌ هۆرامی و هۆرامانی زانی. هۆرامیانه‌ ویر و ره‌فتار که‌رێ. به‌ زوانی هۆرامی و په‌ی خه‌ڵکوو هۆرامانی ئه‌ندیشه و ئێحساسوو وێش به‌یان که‌رێ. یاوگه‌ی ئه‌وپه‌ڕین و گردوو ته‌لاشیش ئانه‌ بێ خه‌ڵکوو هۆرامانی بیاوانه‌ زوان و فه‌رهه‌نگه‌که‌شا وێپا و جیاوازن و یاوایچشه‌نه‌. وێسازنه‌ر بێ و وێپا. ژیواشه‌نه‌ به‌ کردار و هه‌رمانه‌ی مانیانه‌شناسانێ‌ وێش نه‌وست په‌ناو و په‌ته‌و هیچ مه‌سڵه‌حه‌ت و مه‌نافێعیه‌و پاجوره‌ ژیوا که‌ باوه‌رش وازێ. جه‌ یه‌ک ڕێسه‌نه‌ مه‌کریو بواچیو مسته‌فازاده‌ جه‌ تاڵانه‌و ئه‌ده‌بیاتینه‌ یه‌ک جار و په‌ی هه‌میشه‌یی که‌ڵه‌که‌و ناسیونالیسمی کوردیش جه‌ هۆرامانه‌نه‌ تێک و مه‌کان دا و وڕناش‌ پێوه‌ره‌ و ڕاو هۆرامانیش وه‌ش که‌رده‌. جه‌م و جه‌له‌سه‌نه‌، یانه‌کانه‌ و فێرگاکاو مه‌حاڵوو هۆرامانینه‌ خێت به‌ خێتوو واتار، کتێب و ویره‌ به‌رزه‌کاو ئا بڵیمه‌ته کوچکه‌رده‌یه‌‌ بیێنێ به‌ چراوه‌و ڕوشنایی. نامێ و یادش یاگه‌یاد، یاگه‌پاش و شونه‌ماش یاگه‌هه‌رمانو ڕاویاراو ڕاو هۆرامانین. مسته‌فازاده‌ به‌ جه‌سته‌ لاماوه‌ نه‌مه‌نه‌ن به‌ڵام تا قامی قیه‌مه‌ت نمادو هۆرامی و هۆرامانی بیه‌یی، نیشانێ ئازاده‌گێ، وێ بیه‌ی، وێپه‌رمی و راهنماوه‌ و قیبڵه‌نماوه‌ زوان و فه‌رهه‌نگو هۆرامانین. باروومش به‌رز و ڕاش په‌ڕ هه‌ساره‌ن. ئیسه‌ جه‌ یانه‌و یادیشه‌ هه‌زاران چراوێ گڕای گڕا. چی ساڵیاد و یاگه‌هاڵیانشه‌نه و‌‌ ئه‌چی هه‌واروو دارسه‌یرانوو مه‌ریوانینه‌ جارێوته‌ر چه‌نی ویره ‌به‌زره‌کاش قه‌وڵ و په‌یمانما تازه و واوه‌ی مه‌که‌رمێوه‌ و تا ئاخرین هه‌ناسه‌ ژیوایما پا زوانیه‌ که‌ به‌ "زوانو ژیوای"ش زانێ‌ ژیوای ژیومێ، ژیوای مه‌ژیونمێ، ته‌لیله‌ مه‌کرمێ و به‌ کردار و به‌ لێره‌:

منویسمێنه‌ به‌ زوانی هۆرامی و موانمێنه‌‌ و موانمێوه‌ به‌ زوانی هۆرامی چوونکه‌تێ‌ ئاڵاو قه‌ڵه‌می نه‌بڕیرینه‌ به‌ باڵاوه‌ هیچ مێلله‌تیه‌ره‌.

 

 

دمانویسیا:

ئی واتار یا مه‌تڵه‌به‌ جه ‌یۆوه‌مین گلێروه‌بیه‌و ساڵیادوو مه‌رگوو زینه‌یاد محه‌ممه‌د مسته‌فازاده‌ینه‌ (26 ئارگاو 1392 ک.ر.) سه‌روو گڵگو ئا مه‌رحوومیوه جه‌ دارسه‌یانوو مه‌ریوانینه‌‌‌‌ په‌ی ئاماده‌بیه‌کا وانیانوه‌.

 

 

26 ئارگاو 1392 کوچی روجیاری

16 ژانوییه‌و 2014 مه‌سێحی

مه‌ریوان. داریوش ره‌حمانی

نوشته شده در تاريخ دوشنبه سی ام دی ۱۳۹۲ توسط كوورش ئه‌ميني

 

ماواو ئی دڤه‌ حه‌فته‌یه‌نه‌ که‌ ستوونێوه‌ به‌ نامۆ "ده‌لاقه‌و ئاوه‌زی" جه‌ حه‌فته‌نامه‌و "سیروان"ی وه‌رچه‌م وازیه‌نه‌ کریه‌ینه‌وه‌ و تا ئیسه‌ دڤێ شمارێش ئامه‌ینێ به‌ر ؛ دۆس و ئاشنا و ته‌نانه‌ت  نه‌ژناسێچ جه‌ ڕاو ته‌له‌فوون و ئیمه‌یل و کامێنته‌ تایبه‌تیانه‌، ته‌ماس و پێوه‌ندیشا چنی که‌ردێنمێ و گردێ به‌ جۆرێو گه‌ره‌کشا بیه‌ن بزانا چ که‌سانێو ئی هه‌رمانه‌ ئێژا و گریک دارێشا که‌ردێنه‌ په‌ی گه‌شه‌و زوان و ئه‌ده‌بیاتوو هه‌ورامانی.چێگه‌نه‌ و جه‌ ڕاو ئی بانگه‌وازیه‌وه‌ ماچمێ که‌ ئی هه‌رمانێ به‌ پێوه‌ندی و هه‌وڵ و ته‌قالا و ئه‌وپه‌ڕوو زه‌حمه‌توو ئی ئازیزا سه‌رش گێرته‌ن:

1ـ نویسه‌ر و په‌یجۆرکاروو زوانی هه‌ورامی کاک عه‌بدوڵڵا حه‌بیبی.

2ـ ئازیز و وه‌شه‌ویس، نویسه‌ر و قه‌ڵه‌م به‌ ده‌سی نۆتشی کاک فه‌ریدی کریمی جه‌ سنه‌نه‌.

3ـ ڕاویاروو ڕاو زوان و فه‌رهه‌نگوو هه‌ورامی کوورش ئه‌مینی.

 

کوورش ئه‌مینی     

8 وو ئارگاو 1392 ی کۆچی ڕۆجیاری



نوشته شده در تاريخ دوشنبه نهم دی ۱۳۹۲ توسط كوورش ئه‌ميني
HATAV